Axentes da Garda Civil detiveron a un veciño de Baiona, de 44 anos de idade, como presunto autor de case unha vintena de roubos cometidos en vivendas, comercios e vehículos nesta localidade.

Segundo informaron fontes do Instituto Armado, a detención produciuse este mércores, cando os axentes sorprenderon ao sospeitoso ‘in fraganti’, roubando no interior dunha vivenda próxima ao seu domicilio.

Trátase dun consumidor habitual de estupefacientes, segundo a Garda Civil, “cun amplo historial delituoso”, e as investigacións atribúenlle a autoría de 16 delitos contra o patrimonio. A maior parte deles foron roubos en domicilios, aos que accedía forzando as fechaduras de portas ou xanelas, e aproveitando a ausencia dos seus moradores.

Tamén se lle atribúen varios roubos no interior de vehículos, así como nun restaurante, unha discoteca e un hotel de Baiona, onde provocou un incendio. No rexistro practicado no domicilio do detido atopouse unha importante cantidade de efectos subtraídos, entre eles, roupa, calzado, ferramentas, unha bicicleta e dúas táboas de surf.

As dilixencias instruídas foron postas a disposición do xulgado de instrución de garda de Vigo, ante o que o detido compareceu por vía telemática, e quedou en liberdade, investigado por estes feitos.