O alcalde de Vigo, Abel Caballero, anunciou que convocou a Xerencia Municipal de Urbanismo para levar a próxima semana o proxecto do ascensor que conectará a praza da Estación, xunto á que se constrúe o centro Vialia, e a confluencia das rúas Vía Norte e Urzáiz.

Preguntado tras unha rolda de prensa telemática celebrada este xoves, sinalou que o prazo de execución da obra ascenderá a “varios meses” e que espera que estea finalizado “neste mandato”, é dicir, antes de maio de 2023.

Deste xeito, sacarase a concurso o proxecto, que levará a cabo a empresa á que se lle adxudique. Tamén explicou que aínda non se fixou un orzamento para a obra.

En concreto, o rexedor detallou que o ascensor se situará xunto ás escaleiras que conectan a praza da Estación coa Vía Norte e o seu custo será asumido polo Concello. A ese respecto, apuntou que no proxecto definitivo do centro Vialia se contempla a colocación da fachada da antiga estación de tren na zona.

Neste sentido, Abel Caballero remarcou que esta actuación busca conectar ambas as partes da cidade e lembrou as obras vinculadas á remodelación dese ámbito, motivado pola construción da estación deseñada por Thom Mayne, tamén inclúen a instalación dun ascensor que o conectará coa rúa García Barbón.