As probas de COVID-19 realizadas a usuarios e persoal da residencia de Nigrán na que se rexistraron dous casos positivos arroxaron resultados negativos.

Fontes da Xunta precisaron que os test foron realizados aos traballadores entre o xoves e o sábado da pasada semana, así como que este mércores se someteu aos residentes a novas probas despois de que dous deles presentasen síntomas de contaxiarse.

En concreto, o traslado de 22 maiores á residencia de tempo libre autonómica de Patos, en Nigrán, realizouse co obxectivo de centralizar a atención ás persoas deste colectivo non infectadas.

As mesmas fontes defenderon o traslado realizado desde os centros xeriátricos DomusVi de Barreiro, en Vigo, e DomusVi de Cangas, intervidos pola Xunta tras rexistrarse varios positivos por COVID-19, ao asegurar que se trataba dunha medida baseada en criterios “científicos e sanitarios” coa que, ao seu xuízo, non se debía vincular a aparición de contaxiados.

De feito, lembraron que se someteu a estas persoas maiores a tres probas diagnósticas, dúas PCR e un test de anticorpos, que deron negativo en coronavirus.

Posteriormente, nos últimos días, dúas mulleres procedentes da residencia viguesa arroxaron resultados positivos en probas de coronavirus realizadas despois de que presentasen síntomas que indicaban que podían contraer esta patoloxía. Deste xeito, unha delas foi trasladada ao Hospital Álvaro Cunqueiro de Vigo, mentres que a segunda, que non precisou ser ingresada, foi devolta ao centro de Barreiro.