O Bloque Nacionalista Galego (BNG) condenou a xestión da crise sanitaria do COVID-19 realizada nas residencias de maiores da área de Vigo e esixiu que se “depuren responsabilidades”.
Mediante un comunicado conxunto, os portavoces da formación en Vigo, Cangas e Nigrán, Xabier P. Igrexas, Mercedes Giráldez e Xavier Rodríguez, mostraron o seu apoio ás familias dos usarios das residencias de Barreiro, Aldán e Patos destas localidades e lamentaron que o traslado de persoas non contaxiadas por COVID-19 á última fose “tardía”.
Ademais, afirmaron que o feito de que se detectaron dous positivos na residencia de Nigrán habilitada para persoas non infectadas mostra a “improvisación” desta medida por parte do Goberno galego, así como que foi tomada sen as “suficientes” garantías.
Así mesmo, lamentaron a “inacción” da Xunta ante unha “situación límite” que “desprotexeu un colectivo vulnerable” ante o coronavirus e puxo “en risco” os usuarios e traballadores de residencias de maiores.
Do mesmo xeito, os portavoces do BNG na zona criticaron a “falta de información” proporcionada en relación ao modo no que se desenvolveu a intervención das residencias de Barreiro e Aldán. A ese respecto, aseguraron que se procedeu á derivación hospitalaria de usuarios sen remitirse “información completa ás súas familias”, así como que non se concretou o número de traballadores cos que se reforzou a atención nestes centros.
Así mesmo, lembraron que a formación frontista reclamou que se atendesen as demandas do persoal destas residencias para corrixir as “deficiencias detectadas” nelas, como a carencia de zonas de illamento para infectados e a falta de comunicación coas familias destes.
