Axentes da Policía Nacional da Comisaría de Vigo detiveron a un veciño da cidade, de 24 anos de idade, como presunto autor dun delito de tráfico de drogas, e ao que se lle interviñeron diversas cantidades de cocaína, MDMA (éxtase) e máis de 6.600 euros en efectivo.

Segundo informaron fontes policiais, este individuo xa estaba no punto de mira dos axentes, que sospeitaban que realizaba actividades delituosas no seu domicilio, por mor dunha intervención anterior da Unidade de Seguridade Cidadá.

Esta unidade trasladou as súas sospeitas ao grupo de UDEV III da Brigada de Policía Xudicial, especializado na investigación de tráfico de drogas e que, ademais, xa estaba a investigar ese posible ‘punto negro’ de venda de estupefacientes.

No marco desa investigación, e coa correspondente autorización xudicial, realizouse unha entrada e rexistro a pasada noite no domicilio do sospeitoso, na zona de Tomás Alonso. Alí, os axentes atoparon unha cantidade de cocaína de elevada pureza, suficiente para preparar máis de 500 dose, e que podería alcanzar un valor de 12.500 euros en venda.

TRES DETENCIÓNS ANTERIORES

Así mesmo, a Policía incautouse de MDMA, que alcanzase no mercado ilícito un valor duns 1.100 euros, e útiles para manipular, cortar e envasar a droga, así como 6.650 euros en efectivo.

O mozo foi detido e trasladado a Comisaría, onde se comprobou que, no seu historial, figuran tres detencións anteriores. O arrestado e as dilixencias practicadas foron postos a disposición do xulgado de instrución 1 de Vigo.