A sede de Afundación en Vigo acolle este mércores e este xoves o I Congreso Internacional de Compliance na industria pesqueira, sobre o cumprimento normativo neste sector, no que participarán expertos xurídicos e tributarios, representantes de organizacións pesqueiras, e de empresas, entre outros relatores.
O evento foi inaugurado este mércores pola conselleira do Mar, Rosa Quintana, quen celebrou que a organización elixise Vigo para esta primeira cita, o que consolidaría a cidade olívica como “capital mundial” do sector pesqueiro.
Quintana subliñou que o congreso servirá para marcar unha “folla de ruta” que será marco de referencia no cumprimento normativo, e expresou o seu desexo de que administracións e empresas estean “á altura”, dado que “o escenario adivíñase intenso e apaixonante”. “O camiño do cumprimento normativo é longo, pero permite afrontar novos retos”, proclamou.
Así, fixo fincapé en que a reunión destes días “axudará a albiscar unha cultura ética empresarial e a analizar o nivel de compromiso” de todos os axentes da industria pesqueira. Trátase dun exercicio, recalcou, que “sensibilizará” ao sector no desenvolvemento dunha “cultura ética corporativa”.
A conselleira lembrou que esta industria é “especialmente sensible” á comisión de certos delitos, que poden derivar en responsabilidades penais empresariais. A ese respecto, mencionou a normativa sanitaria, a calidade e trazabilidade, a normativa aduaneira, e outras regulacións que obrigan ao sector da pesca a “contar con medidas adecuadas para evitar riscos”.
Finalmente, Rosa Quintana apostou por converter esas obrigacións en “oportunidades” para xerar maior nivel de confianza nos mercados, valor engadido para a imaxe das empresas e diferenciación fronte aos competidores.
CONGRESO
Este congreso, promovido pola World Compliance Association, reunirá estes días en Vigo a decenas de expertos, para abordar cuestións como a normativa laboral, o control de calidade dos produtos, a loita contra a pesca ilegal, ou a responsabilidade penal das empresas pesqueiras.
Entre os relatores, destacan o fiscal de delitos económicos, Juan Antonio Frago; o xefe rexional de Aduanas e Impostos Especiais de Galicia, Jaime Gayá; a directora de Fedepesca, María Luisa Álvarez; o responsable de transportes e cuestións marítimas da Organización Internacional do Traballo, Brandt Wagner; o responsable da oficina de pesca da FAO, Joe Zelasney; ou o director da Axencia Europea de Control da Pesca, Pascal Savouret; entre outros.
