Gonzalo Dasilva Fernández, misioneiro vigués de 58 anos de idade, faleceu en Madrid a causa do coronavirus, segundo confirmaron fontes da Diocese de Tui-Vigo.

Nas últimas horas, a Congregación dos Misioneiros Combonianos, á que pertencía Dasilva, confirmou o falecemento deste sacerdote, que se produciu o pasado domingo.

Poucos días antes, empezara a notar síntomas leves e confinouse, con seguimento médico telefónico. A pesar de parecer que a súa situación mellorara, o pasado domingo “tivo unha crise e, con sorpresa de todos, faleceu”, segundo trasladou o Bispado.

OGonzalo Dasilva estudou no Seminario Menor dos Misioneiros Combonianos do Corazón de Xesús en Santiago, e fixo o seu postulantado en Granada, onde estudou na Facultade de Teoloxía. Tras o seu paso posterior por Moncada (Valencia), proseguiu os seus estudos teolóxicos en Londres e Roma, antes de ser ordenado sacerdote en España, en 1990.

Dous anos despois foi destinado á Misión desta congregación en Togo, Gana e Benín, en África, onde estivo durante 18 anos. En 2011 regresou a España para traballar no economato provincial.