A dirección da planta de PSA Peugeot Citroën en Vigo trasladou este martes aos representantes dos traballadores as medidas de acompañamento do Expediente de Regulación Temporal de Emprego (ERTE) que afectará a todo o persoal (máis de 7.400 operarios).
Segundo confirmaron fontes da propia empresa, a regulación, que entra en vigor con data 17 de marzo (ou 18 para quen deixasen de traballar nesa xornada), afectará a todos os traballadores e a empresa aplicará “unha mellora” para que cobren o 80 por cento do seu salario bruto (salario máis complemento individual).
No caso dos traballadores a tempo parcial, se calculará o 80 % sobre a xornada teórica que se utilice normalmente como referencia para cada modalidade, e non quedan impactados polos días de suspensión os dereitos de vacacións nin o tempo traballado para os efectos do cálculo da retribución variable.
Por outra banda, a empresa trasladou a posibilidade de que os empregados que o desexen, de forma voluntaria, poidan acollerse aos seus días de ‘adecuación de xornada’ (10 días) ou a mecanismos como a bolsa de horas individuais.
LUZ VERDE DE SIT, CC.OO. E UXT
As medidas que acompañan ao ERTE tiveron o visto e prace do sindicato maioritario, SIT, e de UGT e CC.OO., que xustificaron a súa posición pola realización dun “exercicio de responsabilidade”, e tendo en conta que se atendeu a súa demanda de que a totalidade do persoal poida acollerse á medida.
No entanto, desde CC.OO. trasladaron varias puntualizacións, especificamente relativas á “máxima dureza” da empresa que, a pesar dos seus beneficios, non complementa os salarios do ERTE “como mínimo, á altura da media do sector (ata o 85 % de salarios e o 100 % de pagas extras e vacacións)”. “PSA non foi capaz de entender que, nestes momentos, o económico debe pasar a un segundo plano, e que todos debemos arrimar o ombreiro”, lamentaron desde este sindicato.
CC.OO. criticou que nin CIG nin CUT desen a súa conformidade ás medidas do ERTE, porque coa firma de todas as centrais daríase o “empaquetado necesario” para que a autoridade laboral “non dubidase” en aprobar o expediente. A ese respecto, advertiu das consecuencias que tería para gran parte do persoal a non aprobación do ERTE por parte da Administración
CRÍTICAS DE CIG E CUT
Pola súa banda, a CIG criticou a “insolidariedade” da dirección da empresa, en contraposición a outras compañías que realizan achegas para “compensar a perda económica” dos seus traballadores, e nas que os cadros de persoal cobrarán entre o 85 e o 90 % dos seus salarios.
Así mesmo, a central nacionalista, que criticou a “neglixencia” da planta por permitir que o persoal traballase nos primeiros días do estado de alarma, censurou a “falta de responsabilidade social” de PSA, nun momento no que “todos” están a loitar contra unha pandemia “que paralizou todo o Estado español”.
Mentres, a CUT tamén expresou a súa desconformidade coas medidas de acompañamento do ERTE, que tachou de “insuficientes”. A ese respecto, e do mesmo xeito que outros sindicatos, lembrou os beneficios millonarios do grupo, e mantivo que a empresa debería compensar aos operarios regulados para que cobrasen o 100 % dos seus salarios.
