O Ilustre Colexio oficial de Médicos de Pontevedra informou que abrirá expedientes disciplinarios a todos aqueles colexiados que animen á cidadanía a desatender ás autoridades sanitarias a través das redes sociais.
Esta institución tomou esta decisión despois de que durante esta semana se fixera viral unha mensaxe de audio a través de Whatsapp dunha médica de Familia de Vigo que traballa nunha clínica privada e que asegura que se está manipulando “emocional e psicoloxicamente” á sociedade coa información que se transmite sobre o coronavirus.
Ademais, o seu testemuño afirma que os datos de afectación desta patoloxía “non son significativamente máis graves” que os da gripe estacional e que as cifras da OMS “non xustifican a alarma social”.
Ante estas declaracións, o Colexio de Médicos de Pontevedra quere deixar claro que a súa institución “apoia absolutamente todas e cada unha das normas sanitarias ditadas polas autoridades competentes” para tratar de liquidar esta situación que, ao contrario que a médica, tachan de “extrema gravidade“.
Así mesmo, instaron á poboación a “seguir a machada” a totalidade das medidas establecidas polo estado de alarma e recoñecen o labor profesional que desenvolven os sanitarios para erradicar esta pandemia.
