A dirección da Feira Internacional da Industria Naval, Navalia, que ía celebrarse no Instituto Feiral de Vigo no mes de maio, anunciou este venres o seu adiamento ata finais de outubro, “ante a evolución xerada pola expansión do COVID-19 a nivel mundial e as medidas postas en marcha polo Goberno de España”.
A través dun comunicado, a empresa organizadora do evento, ‘Muéstralo’, trasladou que “é fundamental garantir a saúde dos expositores e dos visitantes” e contribuír á “contención” do virus. “Estas dúas premisas deben estar por encima da celebración de calquera evento“, apuntaron desde Navalia.
A organización sinalou que, para tomar esta decisión, tivo moi en conta “as posibles futuras restricións internacionais que poidan afectar, principalmente, ao peche de aeroportos e/ou fronteiras, e á mobilidade das persoas en xeral”.
A feira, que xa confirmara a participación de 400 expositores e 700 firmas do todo o mundo, recoñeceu que o adiamento supón “un contratempo difícil” e pediu “comprensión e paciencia” aos expositores, moitos dos cales poden “atopar inconvenientes no cambio de datas”.
