A falla de dispoñibilidade de maquinistas obrigou a Renfe a suprimir varios trens durante a pasada semana en Vigo. Segundo trasladou o sindicato CXT, a situación afectou 10 servizos en total e a falla de profesionais xa obrigara a restrinxir 74 no mes de decembro de 2019.
Desde a empresa atribúese os problemas a circunstancias puntuais. Segundo detallou, varios dos profesionais atópanse realizando tarefas de formación o que, unido a outras causas como baixas laborais e vacacións, “provocou algunha supresión de servizos de media distancia”.
A normativa de Renfe “obriga aos maquinistas a habilitarse nos trens e traxectos onde prestan servizo”, sinalou a empresa. Esta habilitación inclúe “o material (trens), infraestrutura, normativa e, nalgúns casos, a lingua portuguesa”, o que implica “períodos de formación moi longos” de formación. (con cursos de 217 días e máis de sete meses de duración).
A compañía asegurou que esta supresión afectou a trens “de moi baixa ocupación” e a empresa “ofreceu en todos os casos un servizo alternativo aos viaxeiros”, ben a través de taxis ou de autobuses.
A pesar diso, defendeu a dispoñibilidade de persoal “suficiente” para prestar servizo na provincia de Pontevedra, “con normalidade, sempre que non concorran outras circunstancias” (baixas laborais, descansos, xubilacións, etc.).
Desde CXT, con todo, critican a interlocución “deficiente” da empresa para solucionar os problemas dos traballadores e a falta de medios, como así llo trasladaron en decembro e xaneiro.
