A Audiencia Provincial de Pontevedra acollerá o vindeiro xoves o xuízo contra un veciño de Ponteareas acusado de violar a unha nena de 14 anos que padecía unha discapacidade intelectual, así como de pedirlle que lle enviase fotos e vídeos de contido pedófilo.

Segundo se recolle no escrito de acusación de Fiscalía, os feitos remóntanse ao verán de 2017, cando a menor, que se atopaba en réxime de acollida, acudiu ao domicilio do acusado, unha persoa relacionada coa súa familia de acollida.

Durante o mes de xuño dese ano, e co ánimo de “satisfacer o seu instinto sexual”, Fiscalía cre que o home “comezou a ter contacto telefónico” coa menor, “enviándolle mensaxes nas cales lle propuña manter relacións sexuais con el“.

En todo momento, precisa, o home era consciente de que a nena tiña 14 anos de idade e que sofre un atraso madurativo que lle causa unha discapacidade do 35%.

FOTOGRAFÍAS DE CONTIDO PEDÓFILO E ENCONTROS

A maiores, supostamente, o acusado solicitou á menor que lle enviase fotografías espida e en actitude sexual “explícita”, ao cal a accedeu, e envioulle tamén a ela fotografías do seu pene.

Nun día non determinado do mes de xuño de 2017, recolle o escrito, o procesado indicou á moza que saíse a pasear a unha zona de monte próxima á súa vivenda, “un lugar deshabitado e pouco concorrido onde se atopaba unha cuadra desocupada”. Foi alí onde, supostamente, someteuna a tocamentos e bicouna en contra da súa vontade, feitos que o Ministerio Público defende que se repetiron noutro día.

Tempo despois, no mesmo lugar, o home volveuse citar supostamente coa menor, á que o fiscal asegura que violou “a pesar de que” ela lle “dicía ao procesado que parase”. “Isto repetiuse en múltiples ocasións”, apunta.

Por iso, Fiscalía pide para o acusado 19 anos e 10 meses de prisión, 11 deles por un delito continuado de abusos sexuais con violación a unha vítima menor de 16 anos e outro oito anos e 10 meses por elaboración de pornografía infantil.

A maiores, esixe que o home non poida comunicarse ou achegarse á vítima e que se lle vete a realización de calquera traballo, remunerado ou non, que implique contacto con menores. Pide para a nena unha indemnización de 25.000 euros.