A Xunta de Galicia volveu a urxir ao Concello de Vigo a aprobación do plan parcial para acometer a ampliación do barrio de Navia, sen o cal non poderán executarse as obras de urbanización, e reiterou que dito instrumento de planificación servirá para “distribuír o terreo existente” e, en ningún caso, pode regular a construción dun instituto, reclamada polo goberno vigués.
Así o trasladou a conselleira de Medio Ambiente, Territorio e Vivenda, Ángeles Vázquez, que este mércores visitou os terreos do Instituto Galego de Vivenda e Solo neste barrio de Vigo. Segundo lembrou a conselleira, perdeuse “o ano 2019, no que o goberno galego dispuña de 6 millóns para iniciar as obras e, neste 2020, volve haber 6 millóns de euros orzados para avanzar nesa actuación, que prevé a construción de 1.600 vivendas de promoción pública.
“Non podemos seguir nesta situación, esiximos ao Concello que se aprobe o plan parcial. Comezou a tramitación hai dous anos e seguimos na mesma liña”, lamentou, e advertiu de que “non hai desculpas de carácter técnico”. Ademais, lembrou a conselleira, a administración autonómica ten acordos de permuta cos propietarios duns 42.000 metros cadrados, e ditos acordos poden caducar. “Acábasenos o tempo, hai que tomar unha determinación”, incidiu.
En calquera caso, asegurou que a Xunta “non vai deixar de traballar” e prevé, no mes de febreiro, adxudicar a redacción do proxecto de urbanización e o proxecto de expropiación. “Pero non podemos empezar a executar os traballos ata ter o plan parcial”, engadiu.
DEMANDA DUN INSTITUTO
Con respecto á demanda do goberno de Vigo, de que a Xunta firme un convenio para comprometerse a construír un instituto de secundaria nese barrio, Vázquez explicou que a finalidade dun plan parcial é “distribuír o terreo existente”.
Así, no proxecto de ampliación de Navia haberá, entre outros espazos, 25.000 metros cadrados de zonas verdes, 24.500 metros cadrados de equipamentos e 189.000 metros cadrados destinados a vivendas. “Na zona que sexa de equipamento poderase instalar un instituto ou outra cousa, pero iso non é obxecto de debate. Temos que ter o chan habilitado para empezar a urbanización”, sinalou.
CONCURSO DE IDEAS
Por outra banda, a conselleira de Medio Ambiente, Territorio e Vivenda anunciou que a Xunta convocará un concurso de ideas para que haxa unha “perfecta integración” das vivendas (que serán unifamiliares e en bloques) na súa contorna urbana e na paisaxe.
Con esta iniciativa perséguese, segundo a conselleira cumprir os “obxectivos de sustentabilidade”, ademais da integración na contorna, e “ter claro o tipo de vivenda” que se construirá nese barrio.
