O ano comeza co anuncio dos primeiros campionatos de caza de raposo. A Federación Galega de Caza vén de convocar o XV Campionato Provincial para este sábado, 11 de xaneiro. San Xoán de Poio, Barro, Moraña, O Campo, San Huberto, San Cibrán e Armenteira serán os lugares onde se han producir estes eventos.

As reaccións da cidadanía en contra da súa celebración non se fixeron esperar e a través de Facebook, diversos particulares instan a poñerse en contacto cos concellos onde se producirán estes campionatos para mostrar o seu rexeitamento. Baixo os cancelos #eunondisparo, #raposovivo e #omonteédetodos, esixen parar co que, entenden, “unha barbarie”.

Polo momento, no Concello de Poio aseguran non ter información sobre o campionato.

BATUCADA RAPOSA

Ademais, as persoas activistas tamén veñen de anunciar unha “batucada raposa” no lugar de Moraña. Con ela, pretenden facer fuxir os animais e que os cazadores non sexan quen de atrapalos. Chaman a presentarse con “frautas, tambores, pitos, altavoces e todas as músicas para espantar os males”.