O segundo premio, dotado con 750.000 euros por serie, foi para o número 21816, vendido en Galicia. En concreto, este número foi repartido por unha administración de lotería situada en Nigrán.

O establecemento, coñecido como Loterías París e situado na Rúa Rosalía de Castro número 2, vendeu polo menos un billete (premiado con 75.000 euros) que en Galicia só parou por este municipio pontevedrés.

Segundo explicou unha das traballadoras da administración, Adriana, o número foi vendido por máquina e ata o de agora non dispoñen da cantidade total de billetes vendidos.

Ademais de mostrarse “moi contenta” por repartir este segundo premio, no seu establecemento están convencidos de que o gañador foi alguén da zona.

“Neste Sorteo vendemos máis lotería a xente de aquí”, precisou. Mentres que a Lotería de Nadal tamén se adoita vender a turistas ou persoas que veñen de visita, na Lotería del Niño as vendas concéntranse na poboación local, o que a leva a pensar que o agraciado é un veciño.

Aínda que o establecemento está pechado, os traballadores da Administración non abandonaron o local e aseguran que ata o de agora non se presentou ninguén para celebralo, pero aínda están a tempo.

Este mesmo número estivo moi repartido polo resto do Estado, as provincias de Alacante, Barcelona, Valladolid, Valencia, Navarra, Melilla, Madrid, Murcia, Guipúscoa ou Ciudad Real tamén resultaron agraciadas nalgún dos seus municipios.