A Fiscalía reclamou este mércores un veredicto de culpabilidade para César A.O., único acusado polo asasinato da moza enxeñeira Ana Enjamio (ocorrido hai tres anos en Vigo), ao que ve “indubidablemente” como autor do crime, á vez que tachou de “inverosímil”, cando non “patéticas”, as explicacións que deu durante o xuízo.
Así o trasladou a representante do ministerio público durante a exposición do seu informe final ante o tribunal de xurado encargado de axuizar estes feitos, na sección quinta da Audiencia Provincial de Pontevedra (con sede en Vigo), e na que apuntou que Ana Enjamio foi “cosida a puñaladas” por César A.O., que non aceptou o final da súa relación.
Na mesma liña, o letrado da acusación particular indicou que, aínda que nunca apareceu a arma do crime, nin o teléfono da vítima, nin a roupa que levaba o acusado esa noite, “todas as pezas encaixan como un quebracabezas e apuntan na mesma dirección: a culpabilidade”. “Pido que o declaren culpable, que non saia gratis e protexan a calquera outra Ana que se cruce no camiño deste individuo”, proclamou.
