O presidente da Federación Española de Municipios e Provincias (FEMP) e alcalde de Vigo, Abel Caballero, apoia as negociacións que está a levar a cabo o PSOE de cara á investidura de Pedro Sánchez como presidente do Executivo e censurou a actitude do PP, ao que acusou de querer novas eleccións ao manter o seu ‘non’ ao líder socialista e non abrirse á abstención.
Caballero conversou este martes co presidente do Goberno en funcións no marco da rolda de contactos que Sánchez está a manter cos presidentes das Comunidades Autónomas de cara á sesión de investidura, que aínda non ten data marcada.
Durante a mesma, puxo énfase en que é “imprescindible” ter un goberno “canto antes” e lembrou que unha inmensa maioría dos alcaldes españois reclama acordos políticos para conseguir un goberno estable.
“Os Concellos queremos un goberno neste momento e, por tanto, sería bo que os grupos políticos que non queiran apoiar a Pedro Sánchez manifestasen a súa abstención. A negativa, o ‘non’, sería o peor escenario posible para os concellos e as corporacións locais, pois conducen a novas eleccións”, reprochou Caballero ao PP.
Nesta liña, defendeu que o Executivo que se forme debe “estar presidido por Pedro Sánchez”, o partido que máis apoio obtivo nas urnas, e apoiou os contactos que o PSOE está a manter para tentar formar goberno.
Por iso, solicitou a Pedro Sánchez que “continúe no seu impulso e conversas para formar goberno”. Así, lembrou que a posición de pacto con Podemos é un mandato electoral dos cidadáns, “dado que algunha forza política, a mesma noite electoral, dixo e manifestou a súa oposición a ningún acordo co presidente do Goberno en funcións para apoiar a súa investidura”.
Así mesmo, o tamén alcalde de Vigo subliñou a súa oposición a unhas terceiras eleccións engadindo que “colocarían o Estado español nunha situación de innegable paralización e debilidade”. “Cando algún dos grupos políticos manifesta a súa oposición á investidura de Pedro Sánchez, está a avogar por terceiras eleccións”, finalizou.
Caballero lembrou durante a conversa que cando o Goberno de España quixo aplicar o artigo 155 da Constitución en Cataluña tivo o apoio do PSOE e, ao mesmo tempo, apuntou que “cando Rajoy necesitou a abstención do PSOE para constituír o seu goberno, tívoa”.
DECRETO LEI PARA INVESTIMENTO DO SUPERÁVIT
Na conversa tamén abordaron a situación dos Concellos e a necesidade de que se faga un decreto lei para poder investir os máis de 4.500 millóns que os consistorios locais terán de superávit en 2019, así como da importancia para as corporacións municipais de resolver o problema do imposto de plusvalías.
O alcalde socialista, por outra banda, transmitiu ao presidente do Executivo en funcións o recoñecemento da FEMP por actualizar os ingresos a conta, tal e como se lle pediu no pasado mes de setembro.
“Tamén hai acordo co Goberno en incorporar a procesos lexislativos os acordos que houbo sobre teito de gasto no verán, que requirirían de acción de Goberno, así como os proxectos para a reforma da lexislación en favor dos Concellos”, recalcaron desde a FEMP.
Outro dos asuntos mencionados na conversa foi a proposta do xefe do Executivo en funcións de facer un tratamento simultáneo do financiamento autonómico e municipal. Así mesmo, o máximo responsable da FEMP transmitiulle que neste momento xa está en contacto coa Ministra de Facenda en funcións, María Jesús Montero, para os efectos da actualización de coeficientes catastrais, así como do tratamento do sistema de información inmediata do IVE do ano 2017.
A FEMP demanda de forma unánime todas estas cuestións que están a ser atendidas polo Goberno de Pedro Sánchez, e en base a todas estas formulacións, Abel Caballero reiteroulle o seu apoio nas negociacións para conformar un Goberno.
Finalmente, Caballero recoñeceu que a FEMP fora incluída na rolda de conversas ao mesmo nivel que as Comunidades Autónomas, “unha demanda histórica, atendida agora polo Goberno de Pedro Sánchez”.
