Marea de Vigo-Son En Común acusou o goberno local de proxectar obras públicas “sen previr” os seus custos de mantemento e criticou que non contemplase partidas para a súa reparación nin estudase a obsolescencia dos seus equipos.
A través dun comunicado, a formación cualificou de “improvisación” o mantemento de varias actuacións e, en concreto, referiuse ás incluídas na Estratexia de Desevolvemento Urbano Sustentable e Integrado (EDUSI), cofinanciadas con fondos europeos.
Nesta liña, denunciou que obras como os ascensores e escaleiras mecánicas urbanos sofren “avarías permanentes” a pesar de que foron instalados nos últimos anos. Por ese motivo, cuestionou a súa “sustentabilidade” e reprobou que fosen sufragadas con superávit de anos anteriores.
Ademais, Marea de Vigo responsabilizou o alcalde, Abel Caballero, desta situación que, na súa opinión, se debe ao “adianto” dos prazos de execución de obras por motivos electorais, o que leva un “risco” para a seguridade cidadá. Así, achacou ás “présas oportunistas” do rexedor o feito de que a inauguración do parque Cela “se fixese a anacos”.
Nese sentido, a formación remarcou que o proxecto da rampla mecánica que se situará na Gran Vía recolle que o financiamento do seu mantemento se sufragará con recursos destinados ao tratamento da rede viaria da cidade, concesionada a unha empresa construtora. Deste xeito, advertiu de que as avarías deste servizo se repararán “á conta das necesarias melloras en viarias da cidade”, en especial, na zona rural.
