O BNG reclamou este luns que o Concello de Vigo impulse unha estratexia local para avanzar cara a unha cidade “sustentable” e que a declaración de emerxencia climática aprobada no pleno vaia máis aló dunha mera “declaración de cara á galería”.

Así o trasladou o concelleiro nacionalista, Xabier Pérez Igrexas, quen subliñou que a actual “situación límite” esixe un compromiso “que deixe de ser retórico” e que se concrete en “medidas”.

Por iso, pediu que o goberno local impulse esa estratexia e que esta sirva como “instrumento marco para planificar” as actuacións de futuro na cidade. “Para reconciliar a cidade co seu medio natural e avanzar cara a un espazo urbano máis sustentable”, incidiu, á vez que engadiu que esa estratexia debe deseñarse necesariamente coa participación de todos os grupos políticos e de colectivos ecoloxistas e veciñais.

Segundo Pérez Igrexas, a pesar das declaracións do alcalde, os xestos e discursos, “en Vigo queda moito por facer aínda”. “Vivimos nunha cidade onde se baldean as rúas con auga potable, onde hai máquinas de neve artificial, hai unha clamorosa falta de aposta polo transporte público, e segue pendente a recuperación do bordo litoral”, proclamou.