Un total de cinco persoas resultaron feridas debido a unha colisión producida en Redondela na tarde deste domingo con tres vehículos implicados.

Segundo informa o 112, todo ocorreu sobre as 16,00 horas, cando un particular informou do choque entre dous turismos na N-550 en Quintela, concretamente na curva pasando o tanatorio.

De acordo co relato do alertante, indica o centro de emerxencias, un dos vehículos chocou con outro e derrapou, levando por diante a un terceiro. Así, ata o lugar desprazáronse profesionais de Urxencias Sanitarias de Galicia-061, os axentes de Tráfico, a Policía Local e Protección Civil da localidade.

Debido ao impacto, pola estrada quedou esparexida unha mancha de combustible procedente dos coches implicados. Por iso, o 112 solicitou a intervención do servizo do mantemento da vía.