Un incendio producido na mañá deste venres danou un barco do estaleiro vigués Francisco Cardama, situado no número 12 da Avenida de Beiramar. Segundo informacións dos bombeiros a Xornal de Vigo, o lume afectou a un camarote dun barco e xa foi sufucado.

O incendio iniciouse ás 9,40 horas e os servizos de emerxencia tiveron constancia dos feitos a través dunha chamada que solicitaba axuda, xa que se estaba tentando sufocar as chamas “pero non eran quen de apagalas” debido, sobre todo, ao intenso fume, que é “moi contaminante”.

Desta maneira, o Centro Integrado de Atención ás Emerxencias (CIAE) alertou aos Bombeiros de Vigo, á Policía Local, á Garda Civil, a Protección Civil e á Autoridade Portuaria.

Fontes dos Bombeiros de Vigo  destacan que, finalmente, os danos foron mínimos e que o principal problema foi o fume. Hai apenas un mes tamén se produciu tamén outro incendio nun barco neste mesmo estaleiro.