Marea de Vigo levará ao pleno deste mércores unha moción instando as administracións a tomar medidas “legais, económicas e políticas” en apoio ao sector naval da comarca da cidade olívica debido á “situación de gravidade” na que se atopa.

O grupo político insistiu na súa pretensión de que tanto o Goberno central e local como a Xunta, segundo as súas competencias, “asuman o papel de defensa dunha actividade que leva xeracións sendo un motor importante da cidade e de centos de familias traballadores”.

Marea de Vigo instará o Concello de Vigo a convocar “con urxencia” o Consello Económico e Social da cidade co obxectivo de liderar e organizar unha mobilización cidadá polo futuro do sector naval, e en especial por Vulcano e Barreras, e pedirá blindar o uso industrial dos terreos que ocupan actualmente estes estaleiros “evitando usos diferentes ou mesmo especulativos no futuro Plan Xeral de Ordenación Urbana”.

No ámbito galego, a moción insta á Xunta, entre outras cousas, a asumir o seu papel como “instrumento dinamizador” da industria naval, “especialmente no papel de avalista e financiador de buques”.

Pola súa banda, a agrupación política solicita ao Goberno de Pedro Sánchez a “reformular o instrumento público-privado Pymar (Pequenos e Medianos Estaleiros Sociedade de Reconversión)”, para recuperar un mecanismo 100% público “que permita financiar o sector naval previa declaración de sector económico estratéxico”.