O alcalde de Vigo, Abel Caballero, denunciou este luns a “lentitude e desidia” da Xunta de Galicia no que respecta á ampliación do Instituto Feiral da cidade que, ao seu xuízo, “ten que estar ampliado” para a próxima edición da feira Conxemar, en outubro de 2020.
Nunha rolda de prensa, o rexedor olívico criticou que a Xunta optase por facerse cargo do proxecto de ampliación, en lugar de deixar que o faga o propio Conxemar, o que suporá “un atraso letal”.
Caballero proclamou que “é posible” ter un Ifevi ampliado para dentro dun ano porque “os prazos son xustos, pero serven”. Con todo, puntualizou, “requírese vontade, e a Xunta non mostra a máis mínima”, nin para ampliar o recinto para a seguinte feira de Conxemar, “nin para amplialo en xeral”.
Segundo o alcalde, na última reunión do padroado, “a Xunta mostrouse moi remisa” a esa ampliación, e lembrou que gañar outros 5.000 metros cadrados adicionais (o recinto ampliouse hai un ano) suporá que moitas empresas elixirían participar en Conxemar e non na Seafood de Barcelona.
Por outra banda, sinalou Abel Caballero, esta ampliación require un investimento duns 5 millóns de euros, e os orzamentos da Xunta para o ano que vén “só” reflicten unha partida de 100.000 euros.
“Feijóo non ten ningún interese. Non lle ouvín ningunha mención entusiasta”, constatou o rexedor, quen tamén criticou que a delegada da Xunta, Corina Porro, “quere dar cobertura” ao goberno galego asegurando que hai máis diñeiro previsto en partidas “non nomeadas”, algo que “é mentira”.
Finalmente, Abel Caballero avanzou que este martes se reunirá “con xente do Ifevi” para “volver urxir á Xunta” a que “se tome en serio o que ten que ver coa cidade” e con “a economía de Galicia”.
