O portavoz popular do Concello de Vigo, Alfonso Marnotes, lamentou este xoves a situación de “caída libre” que sofre o aeroporto vigués, polo que lle pediu ao alcalde, Abel Caballero, que traballe “dunha vez” por “resucitar” Peinador.
Así o sinalou Marnotes nunha rolda de prensa tras coñecerse este mércores os datos de pasaxeiros publicados por AENA da infraestrutura aeroportuaria, que perdeu un 17,6% de viaxeiros en setembro, o que supón que nun ano descendeu en 71.000 pasaxeiros, “unha cifra alarmante”.
“Somos o único aeroporto de Galicia que perde pasaxeiros, fronte a Lavacolla e Alvedro que aumentan. Xa o dixemos, pero parece que o alcalde non se quere decatar. Se as cousas non van ben, bótalle a culpa a outras administracións e este é un problema que ten que arranxar el”, criticou o portavoz do PP, segundo recolle o partido nun comunicado.
Os populares lamentaron que Peinador xa non conte con voos internacionais e “cada vez ten menos frecuencias nacionais”. “Vigo é unha cidade de primeira, pero as cifras do aeroporto son de terceira”, aclarou Marnotes.
Segundo os datos do Instituto Nacional de Estatística (INE), expostos polo PP, no mes de agosto a cidade olívica rexistrou 91.576 pernoctaciones, fronte ás 113.993 da Coruña ou ás 124.526 de Santiago.
“Somos a cidade de Galicia, das tres que hai con aeroporto, con menor número de pernoctaciones durante todo o verán. E isto débese a que Vigo carece dun plan turístico, dunha estratexia a medio e longo prazo que nos sitúa como destino vacacional”, sinalou Alfonso Marnotes.
