A CIG-Saúde reiterou este luns o seu rexeitamento á venda do hospital Povisa de Vigo e insistiu en demandar que a Xunta de Galicia compre o centro sanitario para así “garantir unha prestación sanitaria pública e de calidade á poboación da área sanitaria de Vigo”.

A organización sindical sinalou que, ao seu xuízo, “os argumentos que utiliza o PP, a Consellería de Sanidade e outros axentes sociais para impedir que Povisa sexa un hospital público son os mesmos que utilizaron para tratar de impedir que o Goberno de Valencia recuperase o hospital de Alzira”.

“A reversión do hospital de Alzira ao sistema público foi posible porque se adoptaron as decisións políticas de defender unha sanidade pública sen negocios nin mordidas”, reivindicou a CIG, quen asegurou que nese caso o goberno autonómico aprobou unha lei que especificaba que “o persoal afectado seguiría no seu posto en condicións de persoal a extinguir, desempeñando as súas tarefas con idénticas condicións do persoal laboral”.

“Quen afirma que o persoal de Povisa pasará a ser estatutario, mente”, insistiu a CIG-Saúde, quen explicou que na lexislación valenciana se especificaba que “a adquisición por este persoal da condición plena de estatutario só se poderá facer mediante a superación dos procesos normativizados”.