A Xunta de Galicia trasladou este venres que está “predisposta” a colaborar co estaleiro Barreras –cuxa xunta de accionistas (liderada por PMI, filial da petroleira mexicana PEMEX) cesou ao seu presidente, José García Costas e a outros dous directivos– e a “apoiar un proxecto que sexa solvente e viable”.
Fontes da Consellería de Economía, Emprego e Industria din que, en todo caso, os cambios na dirección do estaleiro vigués se enmarcan “dentro do ámbito accionarial da empresa”. “Por tanto, son os accionistas os que deben avaliar a situación e, ao mesmo tempo, buscar solucións de cara ao futuro”, apostilaron.
“A Xunta, como sempre, está predisposta a colaborar e apoiar un proxecto que sexa solvente e viable”, incidiron desde a Consellería, á vez que puntualizaron que “a prioridade ten que seguir sendo o mantemento dos empregos no estaleiro e nas empresas auxiliares, así como a carga de traballo de Barreras.
O cesamento de García Costas e de quen eran director xeneral e director de finanzas da empresa pon sobre a mesa a incógnita sobre unha posible capitalización do estaleiro. Actualmente, o accionista maioritario de Barreras segue sendo PMI, cun 51 por cento dos títulos, mentres que o 49 por cento restante está en mans das empresas de García Costas e do grupo Albacora.
Algunhas fontes apuntan á posibilidade de que Ritz Carlton-The Yatch Collection, a división de iates de luxo do xigante hoteleiro, que ten contratados dous barcos nas bancadas viguesas, entre no accionariado do estaleiro; no entanto, outras fontes apuntan a que Barreras, aburada por problemas de sobrecustos en varios encargos, atrasos e débeda con provedores, está abocada a unha situación concursal.
A xunta de accionistas de Barreras cesa a García Costas e a outros dous directivos
