A presidenta da Asociación Galega de Dislexia (Agadix), Esther López, reivindicou a necesidade de “relacionar” este trastorno da aprendizaxe co fracaso escolar dos estudantes que o padecen e criticou que, en ocasións, non se dea cumprimento á normativa autonómica vixente que regula a atención a estas persoas en centros escolares.
Así se pronunciou nunha rolda de prensa na que presentou o IV Xornadas Galegas de Dislexia, que terán lugar durante este venres e este sábado en Vigo. Respecto ao encontro, detallou que aspira a “concienciar” á cidadanía sobre este problema da aprendizaxe e insistiu na importancia de “adaptar o sistema educativo” ás necesidades dos nenos que padecen dislexia, que supoñen en torno ao 10 por cento do alumnado.
A presidenta de Dislexia Canarias e outras Dificultades de Aprendizaxe (Dislecan), Anita Pestana, que intervirá nas xornadas como relatora, remarcou que a dislexia e a discalculia supoñen un “proceso diferente” de adquisición de coñecementos. Ademais, o profesor da Universidade de Barcelona (UB) Josep María Serra resaltou a necesidade de realizar unha “detección precoz” e un seguimento destes trastornos para “minimizar” as súas consecuencias.
A ese respecto, Esther López lembrou que, tras a aprobación da Lei Orgánica de Educación (LOE), abriuse a porta ao desenvolvemento de normativas autonómicas relativas coa atención a estes trastornos. En concreto, indicou que, en Galicia, o decreto 229/2011 regula a atención ao alumnado con diversidade dos centros educativos da comunidade.
No entanto, advertiu de que familiares de nenos con dislexia e discalculia contactan con Agadix para solicitar asesoramento debido ao incumprimento desta normativa nos colexios aos que asisten os seus fillos, que non reciben a atención necesaria. Por iso, sinalou a necesidade de incidir na formación do profesorado co obxectivo de que estes profesionais estean capacitados para detectar e tratar estas dificultades da aprendizaxe.
XORNADAS
En concreto, as xornadas estarán destinadas a docentes, profesionais de gabinetes psicopedagógicos e familiares de nenos que padecen dislexia ou discalculia, que poderán inscribirse mediante a páxina web de Ataquilla. Así, este venres terán lugar distintas relatorios que abordarán o tratamento familiar destes trastornos, así como os procesos de detección e intervención da discalculia. Ademais, ás 18,30 horas, celebrarase unha mesa redonda na que participarán Esther López, a psicopedagoga Marta Fariña, a logopeda Marisol Caamaño e o graduado en Ciencias da Actividade Física e o Deporte Adrián Maroñas.
Así mesmo, este sábado estudaranse as opcións que expón a intelixencia artifical para o tratamento da dislexia e a súa relación coa aprendizaxe de idiomas, así como as súas consecuencias. Adicionalmente, abordarase o marco normativo que regula a atención aos nenos que presentan estas dificultades.
