Unha persoa resultou ferida de consideración nun accidente rexistrado no municipio de Vigo, tras saír da estrada pola que circulaba co seu vehículo.

En concreto, a vítima saíu da vía cando circulaba pola estrada de Camposancos, á altura do número 341, ao seu paso pola parroquia viguesa de Coruxo.

Un particular deu a voz de alarma sobre as 12.00 deste sábado, indicando que unha persoa necesitaba axuda tras saír da vía co vehículo no que viaxaba e precipitarse por un desnivel.

Unha vez no lugar dos feitos, os servizos de emerxencia confirmaron que a vítima se atopaba liberada e accesible, polo que foi descartado o uso do material de excarceración, aínda que presentaba prognóstico grave.

Desde o Centro Integrado de Atención ás Emerxencias alertouse do sucedido a Bombeiros de Vigo, Garda Civil de Tráfico, Policía Local e membros de Protección Civil e de Urxencias Sanitarias de Galicia-061, que se atopaban no punto tratando de estabilizalo antes do seu traslado.