Un home de 47 anos con domicilio en Vigo foi detido este luns nesta cidade por un delito contra a saúde pública tras ser interceptado mentres realizaba unha venda e requisárselle varias papelinas de cocaína.
Segundo recolleu a Policía Nacional nun comunicado, a investigación iniciouse este mes no marco do Plan Especial de Loita Contra o Tráfico Medio de Drogas da comisaría da cidade despois de que os axentes tivesen coñecemento dun posible punto negro de de venda de drogas na avenida de Galicia.
Posteriormente, comprobouse que na zona a trasfega de toxicómanos era constante e que estes esperaban por un home co que realizaban un rápido intercambio en puntos determinados da rúa. Debido a que este señor tomaba medidas de seguridade cando contactaba cos posibles compradores, estableceuse un amplo dispositivo nas inmediacións.
Así, cando observaron como este home se dispuña a levar a cabo unha venda, os policías abordárono. Tras identificalo, realizáronlle un cacheo preventivo grazas ao que lle interviñeron varias papelinas de cocaína. Ademais, foi detido e trasladado a dependencias policiais, onde comprobaron que contaba con antecedentes.
