O Parlamento de Galicia instou ao Ministerio para a Transición Ecolóxica a construír unha subestación eléctrica que forneza ao parque industrial de Balaídos, en Vigo, onde se asenta a factoría de PSA Citröen.
A iniciativa, presentada polo Grupo Popular na Comisión 6ª de Industria, Enerxía, Comercio e Turismo, recibiu o respaldo de En Marea e BNG, mentres que o Partido Socialista optou pola abstención.
“Estamos diante dunha reivindicación totalmente xusta, porque cremos que non estamos en igualdade de condicións para competir con outros lugares de España e Europa“, apuntou a deputada do PPdeG Teresa Egerique.
Na súa exposición, lembrou que se trata dunha actuación incluída na planificación para o período 2015-2020 de Rede Eléctrica de España, aprobada durante o goberno do popular Mariano Rajoy.
Así as cousas, a Cámara galega solicita á Administración central que leve a cabo “todas as medidas necesarias para desbloquear este investimento” e así iniciar a construción, que conectaría Vigo á rede de transporte de 220 kilovoltios.
“PSA Balaídos, que está a ser un referente para o grupo grazas á innovación ao saber facer dos seus traballadores, non pode ver reducido o seu nivel de competitividade por carecer dunha suministración eléctrica adecuada“, incidiu Egerique.
