Axentes da Policía Local de Vigo detiveron a un veciño da cidade, identificado como M.C., de 45 anos de idade, como presunto autor dun delito de violencia de xénero, por agredir supostamente á súa parella en presenza dos seus dous fillos menores.

Segundo informaron fontes policiais, os feitos tiveron lugar na noite do mércores, cando unha patrulla acudiu a un domicilio da zona de Navia, alertada por un posible caso de violencia de xénero.

Unha vez alí, a muller que os avisou relatoulles que acababa de ter unha discusión coa súa parella, da que está en trámites de separación. Segundo o seu relato, o presunto agresor estaba a gravala cun teléfono móbil, a pesar de que ela lle pediu que non o fixese e, cando a muller tratou de arrebatarlle o terminal, foi agredida.

Os axentes localizaron á súa parella, quen recoñeceu o que pasara, aínda que negou que agredise á muller (que finalmente logrou sacarlle o teléfono e foi refuxiarse a casa dun veciño). Finalmente, o home foi detido.