A Garda Civil interveu no municipio de Gondomar uns 200 exemplares de plantas exóticas, como xacintos e leitugas de auga, incluídas no catálogo español de especies invasoras, que estaban expostas á venda a través de Internet.

Segundo informou o Instituto Armado, trátase dunhas especies orixinarias de América do Sur que foron introducidas como plantas ornamentais acuáticas para estanques e acuarios en varias partes do mundo.

O xacinto de auga, destaca a Benemérita, “é unha das especies invasoras máis perigosas” que, xunto coa leituga de auga, están incluídas como tales no Real Decreto 630/2013, de 2 de agosto, polo que se regula o catálogo español de especies exóticas invasoras, “o que leva a prohibición xenérica da súa posesión, transporte, tráfico e comercio”, advirte.

En concreto, a actuación, levada a cabo polos efectivos da Patrulla do Seprona da Garda Civil do Porriño, iniciouse ao ter noticia de que, a través de Internet, “unha persoa ofrecía a venda unha ampla variedade de plantas acuáticas, entre as que figuraban algunhas especies exóticas invasoras tales como xacintos de auga (Eichhornia Crassipes) e leitugas de auga (Pistia Stratiotes)”, explicaron as mesmas fontes.

Ao comprobar a identidade do anunciante, o Seprona personouse no seu domicilio en Gondomar, onde se puido comprobar que tiña un xardín cun estanque, con case dous centenares de plantas, no seu maior parte xacintos e leitugas acuáticas.

A inspección do Seprona concluíu coa elaboración dun informe-denuncia que se remitirá á Consellería de Medio Ambiente da Xunta por unha suposta infracción á normativa que regula a posesión e venda de especies incluídas no Catálogo Español de Especies Exóticas Invasoras.

As plantas intervidas quedaron no estanque en calidade de depósito e a disposición da administración competente.