A serie galego-portuguesa ‘Auga seca’ iniciou este luns en Vigo a súa rodaxe, que se completará en distintas zonas da súa comarca e en Lisboa. Este ‘thriller’ sobre o tráfico de armas e o crime organizado será emitido pola TVG e a RTP do país veciño.
Tal e como detallou a Consellería de Cultura e Turismo nun comunicado, a produtora galega Portocabo encabeza este proxecto xunto á empresa portuguesa SP-i. Así, esta produción audiovisual mobilizará a máis de 150 profesionais de ambos os países, entre os que se inclúen técnicos e intérpretes, e a uns 300 figurantes.
Esta iniciativa recibiu unha axuda de 260.000 euros procedente do Executivo autonómico enmarcada nas subvencións destinadas a producións e coproducións de contido cultural galego na modalidade de longametraxes, series de televisión e miniseries.
En concreto, a historia narra como Teresa regresa a Vigo desde Lisboa para investigar o suposto suicidio do seu irmán mentres a Policía deberá enfrontarse a unha rede delituosa oculta ao longo de seis episodios de 50 minutos de duración.
A actriz lusa Vitoria Guerra e os galegos Monti Castiñeiras e Sergio Pazos protagonizarán a serie, cuxo director será Toño López. O seu produtor executivo será Alfonso Branco, quen tamén deseñou o argumento xunto a Pepe Coira, Araceli Gonda e José Rubio e Eligio Montero, Carlos Portela e Ana Míguez.
Os guionistas foron Lida Fraga, Carlota Dans, José Rubio e Eligio Montero, mentres que a dirección de fotografía corresponderá a Ricky Morgade e, a de arte, a Andrea Pozo. Elba Fernández e Xavi Font ocuparanse da música.
