O BNG propuxo este venres que a vella estación de autobuses de Vigo se adapte para albergar prazas de aparcadoiro disuasorio e locais de uso sociocultural e comunitario. Así o trasladou o concelleiro electo da formación, Xabier Pérez Igrexas, quen lembrou que, unha vez que se acaba de licitar a construción da nova estación de autobuses no complexo intermodal de Urzáiz, “é o momento de empezar a planificar que facer coa vella estación”.
Segundo apuntou, a pesar de que é unha instalación competencia da Xunta, debe ser o Concello o que “tome a iniciativa” e faga “unha proposta de consenso”, acordada cos veciños, para darlle novos usos á terminal da Avenida de Madrid.
A ese respecto, o BNG propuxo que se aproveiten as cocheiras para construír prazas de aparcadoiro disuasorio, co fin de que os coches que chegan á cidade desde a Avenida de Madrid poidan aparcar e non teñan que entrar no centro urbano, para o que habería que reforzar as conexións de bus urbano.
Así mesmo, os nacionalistas expuxeron que os locais da planta superior se destinen a usos socioculturais e comunitarios, xa que o barrio ten “déficit” deste tipo de dotacións.
