O alcalde de Vigo, Abel Caballero, insistiu este luns en que o Porto debe arranxar o peirao que se afundiu durante a celebración do festival do Marisquiño (en agosto do ano pasado) “e deixarse de escusas”.

Caballero respondeu así ao comunicado do presidente da Autoridade Portuaria, Enrique López Veiga, no que este insistía en que a responsabilidade do mantemento desa zona é do Concello (en virtude do convenio Abrir Vigo ao Mar) e daba un prazo de 30 días ao goberno municipal para levar a cabo a reparación.

O alcalde olívico instou a López Veiga a “que lea o que dixo a xuíza” que instrúe a investigación, que “lle ordenou” que mantivese a seguridade na zona do accidente e que mesmo “non descartase” refacer o peirao colapsado.

Así, Abel Caballero engadiu que mesmo “os peritos independentes” certificaron que o accidente se produciu por deficiencias estruturais nun peirao que “é competencia exclusiva e obrigación do Porto”.

“Ao presidente do Porto non lle deixa Feijóo. Está a imporlle, obrígalle a saír a dicir todas estas cousas, porque sabe que aquilo é competencia do Porto”, proclamou o alcalde, quen instou ao organismo portuario a arranxar os danos “e deixarse de escusas”.

Por outra banda, Caballero criticou que a Autoridade Portuaria rexeitase a oferta de Zona Franca, de ampliar o aparcadoiro da Laxe e rexenerar toda esa zona, incluído o peirao onde se produciu o afundimento. “Feijóo obrigou ao presidente do Porto a dicir que non (…), porque quere chegar a eleccións con esta lea”, resolveu o rexedor.