A candidata do PP á Alcaldía de Vigo, Elena Muñoz, avogou por construír unha cidade deportiva na urbe que conte cunha piscina olímpica, xa que, segundo asegurou, os veciños da cidade a demandan “desde hai anos”.

Ademais, detallou que no programa electoral da súa formación inclúese a construción de máis pavillóns deportivos nas distintas parroquias e barrios do municipio, así como que, unha vez que se finalicen as obras, se priorice a súa utilización por parte dos veciños.

Tamén propuxo a aplicación dun plan director de instalacións deportivas para “polas en valor” e permitir a súa utilización dun modo gratuíto. Deste xeito, detallou que se busca apoiar os clubs deportivos da cidade para que alcancen as máximas categorías e comprometeuse a fomentar o deporte base.

En canto ás subvencións municipais destinadas a equipos e agrupacións deportivas, incidiu na necesidade de adiantar a entrega do importe asignado e de que o mesmo non dependa do “humor” do edil responsable desta área. Así, incidiu na importancia de garantir a seguridade da concesión das axudas aos equipos.