A Xunta remitiu un informe favorable ao Ministerio de Industria, Comercio e Turismo para que a Reconquista de Vigo sexa declarada Festa de Interese Turístico Nacional.
Segundo trasladou o Goberno galego, será o Executivo central o que deberá proceder a outorgar o distintivo á conmemoración do alzamento popular realizado contra as tropas do exército de Napoleón Bonaparte na cidade olívica en 1809.
A recreación histórica podía converterse así no primeiro evento de Vigo en ser declarado Festa de Interese Turístico Nacional, se o Goberno central ratifica o informe da Xunta.
Ademais, sería a quinta celebración da provincia en recibir este distintivo, co que contan o Cocido de Lalín, a Exaltación do Marisco no Grove, as Festas Patronais de San Roque de Vilagarcía de Arousa e a Festa da Lamprea en Arbo.
