O candidato do BNG á Alcaldía de Vigo, Xabier P. Iglesias, defendeu a promoción do ensino público e apostou pola creación de tres novas escolas infantís municipais.
Xabier P. Iglesias, que se reuniu este venres con membros da Federación Olívica de Anpas (Foanpas), asegurou que, ademais de garantir a apertura de novas escolas infantís municipais, esixirá á Xunta que cre outros tres centros noutros puntos da cidade, segundo recolleu o BNG nun comunicado.
Tamén criticou a equiparación da promoción de centros de educación públicos e privados no portal web municipal e recalcou a necesidade de que o Concello de Vigo potencie a matriculación nas escolas públicas.
Así mesmo, afirmou que as propostas da súa formación “daranlle un novo impulso á cidade” e mostrouse convencido de que, tras as eleccións municipais do 26 de maio, o BNG será unha forza “determinante” na corporación local.
