A asociación de veciños de Teis criticou este mércores o abandono do parque público da ETEA por parte da Xunta e do Concello, e lamentou a “falta de coordinación e entendemento” entre ambas as administracións, que se traduce no mal estado e deterioración que presenta este espazo público.
A través dun comunicado, a entidade veciñal volveu a denunciar a situación do parque infantil e a pista de patinaxe, con zonas verdes descoidadas, papeleiras cheas de lixo e outros danos, nunha zona que é responsabilidade da Xunta de Galicia.
Por outra banda, criticaron os danos que se produciron no peche perimetral da pista de patinaxe, debido a uns traballos de poda realizados polo Concello.
A asociación de veciños, que xa se dirixiu á Xunta e ao Concello para expor os problemas, incidiu en que “o lóxico” sería que a administración municipal asumise o mantemento desa zona.
Ademais, lamentou a “falta de coordinación e entendemento” entre Concello e Xunta, “que non é a primeira vez que se produce na ETEA”, e vese “con claridade” no estado de “abandono” do parque.
