A Policía Nacional busca a un home que, ao mediodía deste luns, atracou unha sucursal do Banco Caixa Geral, en pleno centro de Vigo, de cara e ameazando ao persoal para que lle entregasen o diñeiro.

Segundo informaron fontes policiais, os feitos tiveron lugar sobre as 12,00 horas deste luns, cando este home entrou na sucursal, situada no número 5 da céntrica rúa Policarpo Sanz.

De cara, ameazou aos empregados do banco dicindo que levaba un arma oculta, aínda que non chegou a exhibila, e estes entregáronlle o diñeiro que había neses momentos no mostrador da oficina.

O sospeitoso fuxiu a pé do lugar e, tras recibir o aviso, a Policía Nacional activou o protocolo de atracos e deu aviso a todos os indicativos dispoñibles para localizar ao ladrón. Ao operativo de busca sumouse tamén un helicóptero.

Durante o atraco non se produciron danos persoais e tampouco transcendeu o botín que levou o sospeitoso, un dato que se coñecerá a última hora da mañá, cando os empregados da sucursal realicen o arqueo de caixa.