A Universidade de Vigo (UVigo) creou unha mascota, Oli, co obxectivo de ser percibida pola sociedade como unha institución próxima e coa “man tendida”. Segundo recolleu a universidade nun comunicado, así a presentou o reitor, Manuel Reigosa, este martes en Vigo, onde esperou que “axude a nivel interno con máis sorrisos durante este mandato“.

A directora da área de Imaxe da UVigo, Ana Soler, explicou que Oli será o “embaixador” da entidade e a cara amable que transmitirá a imaxe da xente que traballa na mesma. Ademais, apuntou que, para a súa creación, partiuse dos elementos que integran o escudo da universidade, as ramas da oliveira, que representan o tres campus, e o mar.

En concreto, a cabeza da mascota está creada en forma de folla e dun bocadillo de cómic, en referencia ao diálogo e ao pensamento, mentres que o seu nome relaciónase co inicio da palabra oliveira, coas ondas do mar e cun saúdo. Ana Soler detallou que a tipografía escollida para Oli foi Roboto e que esta foi “pensada para as redes e a (páxina) web (institucional)”.