A Garda Civil detivo a catro cidadáns portugueses que supostamente se dirixían a Portugal en dous vehículos cun cargamento de 7.000 paquetes de tabaco de contrabando que foi interceptado na A-55 ao seu paso por Tui por mor dun auxilio prestado a un coche parado na autovía cunha roda picada.

Segundo o Instituto Armado, os feitos sucederon ás 6,00 horas do pasado día 28 cando unha patrulla do Destacamento de Tráfico da Garda Civil do Porriño localizou a dous vehículos estacionados na autovía A-55, a tres quilómetros da fronteira con Portugal, cando se dirixían a montar un dispositivo de seguridade viaria con motivo das festas de San Telmo en Tui.

As primeiras medidas adoptadas pola patrulla da Agrupación de Tráfico foi sinalizar a zona para garantir a seguridade viaria, debido a que un dos vehículos necesitaba cambiar unha roda que tiña picada, indicaron as mesmas fontes.

“O nerviosismo do condutor do vehículo avariado cando estaba a ser asistido pola patrulla deu lugar a que, unha vez concluído o auxilio mecánico, procedesen a inspeccionar os dous turismos”, sinalou a Benemérita.

Así, ao rexistrar os vehículos, un Toyota Avensis e un Renault Megane, os dous con placas de matrícula portuguesa, púidose observar que ambos transportaban senllos cargamentos de paquetes de tabaco, “sen as preceptivas precintas fiscais que puidesen acreditar a súa legal importación”, destaca a Garda Civil.

En total se aprehendieron 17 caixas que contiñan 7.000 paquetes de distintas marcas, cuxo valor no mercado aproxímase aos 30.000 euros, asegura a Benemérita

No interior dos vehículos os axentes incautáronse tamén de 3.572 euros en moeda fraccionaria e sete teléfonos móbiles, tres deles sen conexión de datos nin xeolocalización.

COLABORACIÓN

Co apoio da Patrulla Fiscal e de Fronteiras da Garda Civil en Vigo, concluíuse coa aprehensión do tabaco e a incautación do diñeiro, os terminais móbiles e os dous vehículos.

Ademais, procedeuse á detención dos condutores e os seus respectivos acompañantes como presuntos autores dun delito de contrabando. Trátase de catro cidadáns portugueses, tres homes e unha muller, en idades comprendidas entre os 20 e os 42 anos, veciños de Vilanova de Gaia, Matosinhos e Porto, algún deles con antecedentes por feitos similares.