Un grupo de traballadores manifestáronse este venres, convocados polo sindicato CUT, ás portas á planta de PSA Peugeot Citroën en Vigo, aos que se sumaron delegados de CXT Limpeza e de CIG en Clece, para protestar polas condicións laborais dos operarios da fábrica e dos empregados dalgunhas subcontratas.
Segundo explicou o sindicato CUT, o persoal de PSA “leva anos de retrocesos tanto no ámbito laboral, como social, económico” e, o que consideran “máis alarmante”, en materia de saúde laboral.
Así, denunciou baixadas e contención nos salarios desde 2014, mentres que, desde ese ano, “o beneficio acumulado do grupo superou o cento por cento, máis de 7.200 millóns de euros”. Ademais, apuntou o sindicato, un traballador eventual de PSA cobra a día de hoxe o mesmo “que hai 23 anos”.
Tamén criticaron que “unicamente” un 28 por cento dos traballadores teñen un contrato indefinido de 8 horas; e que os operarios da quenda de noite están “condenados” a horarios e quendas discrecionales, que poden variar o mesmo día.
Por outra banda, alertaron contra as “condicións de limpeza totalmente insalubres” polos recortes neste servizo, así como outros problemas de saúde laboral derivados da sobrecarga de traballo, que teñen como consecuencia un absentismo medio de case 400 empregados ao día. “Uns malos tratos económicos, psíquico e físico que fai que o noso traballo sexa unha condena que, en moitos casos, non podemos seguir soportando máis”, sentenciaron.
