O Concello do Porriño (Pontevedra) anunciou este xoves a apertura dun expediente informativo á empresa Xesnatura pola “reiteración” de incendios nas súas plantas no polígono industrial das Gándaras.
Segundo informaron fontes municipais a través dun comunicado, a decisión de abrir expediente tomouse despois de que, na madrugada deste xoves, se rexistrase un novo incendio na nave de Xesnatura, aínda que sen danos persoais.
As instalacións xa rexistraron incendios anteriormente (en 2008, 2011 e 2018). De feito, o último lume, ocorrido en setembro do ano pasado, arrasou máis de 120 toneladas de material depositado para reciclar. Esta empresa pertence ao Grupo Couceiro, e dedícase á recuperación e reciclaxe de residuos de plásticos, metais, etc.
A alcaldesa do Porriño, Eva García da Torre (PSOE), sinalou que o Concello actuará “no ámbito das súas competencias”, xa que “resultan reiterativos os incidentes deste tipo neste grupo de empresas”.
Así mesmo, explicou que o Concello enviará ás consellerías de Medio Ambiente e de Industria toda a información que se solicite no marco deste expediente informativo, “para que tamén estes departamentos actúen segundo as súas competencias”.
