A Universidade de Vigo (UVigo) implantará as súas primeiras titulacións duais dos graos de Enxeñaría da Automoción, Enxeñaría Informática e Enxeñaría de Tecnoloxías de Telecomunicación. Esta iniciativa permitirá que os estudantes cursen 60 créditos ECTS nunha empresa que, aínda que teña carácter internacional, conte con instalacións en Galicia.
Así o avanzou o reitor da universidade galega, Manuel Reigosa, este venres nunha rolda de prensa na que afirmou que esta proposta podería “facilitar o seu encaixe laboral” e esperou que poida materializarse en “ano e medio”. Ademais, defendeu que esta aposta pode resultar “moi atractiva” e favorecer a captación de estudantes.
Nesta liña, Manuel Reigosa detallou que a universidade contactou con distintas empresas para trasladarlles esta iniciativa e que, en xeral, recibiu unha “resposta moi positiva”.
Por outra banda, ante a baixada da taxa de matriculación da Universidade de Vigo, que supuxo que este ano se incorporaron a estas facultades 92 estudantes menos que o curso anterior, o reitor explicou que o obxectivo é “axustar a oferta á demanda”, así como que os mozos poidan cursar as titulacións que desexan sen necesidade de desprazarse fóra de Galicia.
EXCEDENTE DE OFERTA
Ademais, o reitor avanzou que tamén se aspira a ofrecer as prazas que non sexan cubertas a estudantes procedentes de países de hispanofalantes e lusófonos. Preguntado pola situación dos graos menos solicitados –entre os que se atopan Enxeñaría Agraria e Ciencias da Linguaxe e Estudos Literarios–, explicou que se deben dar a coñecer as súas “saídas laborais” aos estudantes a través de medidas promocionais.
En canto á diminución da taxa de nova incorporación do alumnado, sinalou que se trata dunha tendencia a nivel estatal que relacionou co envellecemento da poboación e a redución do número de mozos.
ESTUDANTES DE NOVO INGRESO
Mentres, a vicerreitora de Captación de Alumnado, Estudantes e Extensión Universitaria, Natalia Caparrini, concretou que a porcentaxe de prazas de novo ingreso cubertas na UVigo foi do 96 por cento. Por campus, o que presentou unha maior taxa de ocupación foi o de Pontevedra, que superou o 97 por cento, seguido polo de Ourense, cun 96,5 por cento; e o de Vigo, cun 94,5 por cento.
En total, dos case 20.500 matriculados na universidade, foron 3.600 os que se incorporaron durante o curso 2018-2019. Deles, máis duns 16.500 cursan estudos de grao, máis de 2.000, de máster, e ao redor de 1.200, de doutoramento.
A nivel global, as mulleres representan o 51,8 por cento dos matriculados, fronte ao 48,2 por cento dos homes. Así mesmo, a maior parte concéntranse no campus de Vigo, no que se forman máis de 11.200 estudantes, mentres que en Ourense e Pontevedra fano máis de 4.600 e 4.000, respectivamente.
Así mesmo, Caparrini indicou que as ramas nas que se congregan a maioría dos universitarios que cursan os graos ofrecidos, que ascenden a 62, son a de Ciencias Sociais e Xurídicas, que conta con 8.900 matriculados e a de Enxeñaría e Arquitectura, na que a cifra se sitúa en 5.300.
