Un paciente agrediu a un vixiante de seguridade do Hospital Álvaro Cunqueiro (HAC) de Vigo despois de que este lle impedira atacar a un facultativo que lle deu de alta.

Finalmente, tras causarlle varias lesións ao garda de seguridade, o paciente foi reducido e posto a disposición da Policía, segundo explicou Unión Xeral de Traballadores (UXT) nun comunicado no que denunciou que estas situacións “se están facendo rutineiras”.

Por esta razón, o sindicato instou ás “empresas de seguridade, os clientes e as administracións” a garantir “a seguridade e protección dos vixiantes”.

Nesta liña, UXT apelou á Administración para que faga fronte a este “grave problema de violencia” e para que lle dea a estes traballadores a cobertura legal e os medios “necesarios” para o desempeño das súas funcións cun “mínimo de seguridade para a súa integridade física”. Así, defendeu a importancia de adecuar “con criterios técnicos” o persoal deste colectivo.