A quinta edición da Feira das Ensinanzas Artísticas e Profesionais de Vigo mostrará aos seus visitantes en que consisten máis de 100 profesións durante os días 25 e 26 de marzo. En concreto, o evento terá lugar no recibidor do Auditorio Mar de Vigo en horario de 9,30 a 14,00 e de 16,00 a 19,00 horas, segundo explicou a organización nun comunicado.
Deste xeito, os asistentes poderán coñecer distintos oficios relacionados coa barbaría, o deseño de moda, a xoiaría e a hostalaría, entre outros, mediante as ‘casetas’ de distintas escolas de formación da cidade e a súa contorna.
Algúns dos centros que acudirán á cita serán a Escola Superior de Conservación e Restauración de Bens Culturais de Galicia, a Escola de Artes e Oficios de Vigo, a Escola de Imaxe e Son de Vigo (EISV), a Escola de Azafatas e Tripulantes de Cabina de Pasaxeiros de Vigo Air-Hostess e a Escola Superior de Deseño e Moda Goymar-Vigo.
