A presidenta do PP de Vigo, Luisa Sánchez, acusou o alcalde, Abel Caballero, de vivir “alleado da realidade social” por “vetar” un aumento da partida orzamentaria destinada á vivenda nos orzamentos municipais de 2027.
Nun comunicado, os “populares” indicaron que propuxeron un incremento de 4,2 millóns de euros para “apostar dunha forma clara e decidida” pola vivenda, con máis recursos para a compra de solo e vivendas e para aumentar as contías dos distintos programas. Todo iso dentro da emenda á totalidade presentada polo PP, que estaba acompañada dunha proposta de redistribución de 8,4 millóns de euros para reforzar distintas partidas como esta de vivenda, política social e infraestruturas.
“Con todo, o PSOE rexeitou de maneira unánime e sectaria todas elas sen facer o máis mínimo esforzo por negocialas“, criticou Luisa Sánchez, lamentando que Caballero prefira “manter uns orzamentos que son un copia e pega de exercicios anteriores antes de darlle a razón ao PP”.
“Non pedimos aumentar os impostos nin endebedar o Concello, nin gastar máis diñeiro. Só propuxemos gastar doutro xeito os recursos”, insistiu Sánchez, anunciando que formulará un voto particular no pleno do próximo luns para que o grupo socialista “se retracte” de novo votando en contra dunhas emendas que “melloraban as contas”.
