A acampada pola vivenda en Vigo manterase de forma “indefinida” malia o desaloxo, levado a cabo pola Policía Nacional nas últimas horas, da protesta na Porta do Sol de Madrid. Así llo sinalaron a Europa Press os propios manifestantes, que desde o 13 de outubro dormen na Alameda da cidade olívica para reclamar unha vivenda “digna” a prezos “asequibles”.
Con preto de 60 tendas, entre 30 e 40 persoas pernoitan cada día en Vigo co obxectivo de reivindicar solucións ante a “crise” habitacional que sofre a cidade.Pola súa banda, os acampados en Pontevedra celebrarán esta noite unha asemblea para decidir os vindeiros pasos, despois do acontecido en Madrid, segundo lle trasladaron a Europa Press. Deste xeito, convocaron unha rolda de prensa para mañá mércores co obxectivo de informar da decisión tomada.
