O goberno local e o BNG de Vigo criticaron o “abandono” da cidade por parte da Xunta nos orzamentos autonómicos de 2027. Así, nun audio enviado aos medios de comunicación, o portavoz do goberno municipal, Carlos López Font, asegurou que nas contas do Executivo galego para o ano que vén se recolle un investimento en Vigo duns 122 millóns. 

“Onde están os 600 restantes dos que fala a Xunta?”, preguntouse, en referencia aos 736 millóns anunciados pola delegada da Xunta en Vigo, Ana Ortiz, e criticou Font que a cidade olívica supón arredor do 12% da poboación de Galicia e recibe un 0,8% do orzamento. 

Por todo iso, esixiu a dimisión de Ortiz e da presidenta do PP local, Luisa Sánchez, por “mentir con tanto descaro” aos vigueses. Na mesma liña manifestouse o BNG local, que denunciou que dentro dos 736 millóns anunciados se computan “de forma tramposa” os custos dos servizos e das axudas sociais. 

“Por detrás das grandes cifras para alimentar a propaganda, o que hai é a mesma política coa que a Xunta leva castigando Vigo desde 2009”, indicou o portavoz nacionalista, Xabier Pérez Igrexas.  Engadiu que as contas de 2027 son a “demostración de que o PP pretende insistir un ano máis no absoluto abandono” da maior cidade da Comunidade. 

ORZAMENTOS SANIDADE

Pola súa banda, a Consellería de Sanidade informou este luns de que a Área Sanitaria de Vigo disporá en 2027 de máis de 1.100 millóns de euros, un 5,59% máis ca este ano. Esta cantidade inclúe gastos de persoal, de funcionamento, de prestación farmacéutica e de investimentos.  Neste último punto, explica que se destinarán máis de 8 millóns de euros a diversas actuacións tanto no complexo hospitalario de Vigo como na construción de dous novos centros de saúde en Mos e Ponteareas.